D'groussherzoglech Famill

D'Prinzessin Alexandra

Gebuer

16. Februar 1991

an der Maternité Grand-Duchesse Charlotte zu Lëtzebuerg

Portrait de la Princesse Alexandra — © Maison du Grand-Duc / Sophie Margue

Presentatioun

D'Prinzessin Alexandra Joséphine Teresa Charlotte Marie Wilhelmine, Prinzessin vu Lëtzebuerg, Prinzessin vun Nassau a Bourbon-Parma, ass dat véiert Kand an déi eenzeg Duechter vum Grand-Duc Henri an der Grande-Duchesse Maria Teresa vu Lëtzebuerg. Hir Bridder sinn den Ierfgroussherzog, de Prënz Guillaume (1981), de Prënz Félix (1984), de Prënz Louis (1986) an de Prënz Sébastien (1992).

D'Prinzessin Alexandra dréit den “Ordre du Lion d'Or de la Maison de Nassau” zanter 2009.

Le Grand-Duc et la Princesse Alexandra en vacances — © Kollektioun Maison grand-ducale de Luxembourg

De Grand-Duc an d'Prinzessin Alexandra an der Summervakanz

Am Dezember 2022 huet de Grand-Duc an d’Grande-Duchesse d’Verlobung vun der Prinzessin Alexandra an dem Här Nicolas Bagory ugekënnegt. D’Hochzäit war den 29. Abrëll 2023 an der Kierch Saint Trophyme zu Bromes-les-Mimosas.

bei d’Fotoe vun der ziviller a reliéiser Hochzäit

D'Prinzessin Alexandra an den Här Nicolas Bagory sinn Eltere vun enger Duechter, dem Victoire, déi de 14. Mee zu Paräis op d'Welt komm ass.

Ausbildung

D'Prinzessin Alexandra huet hir Primärschoul zu Angelsbierg (Lëtzebuerg) gemaach, duerno goung si an de Lycée Vauban zu Lëtzebuerg, wou si 2009 mat engem literaresche Bachelor, mat Mentioun, ofgeschloss huet.

Duerno ass d'Prinzessin fir Universitéitsstudien an d'Ausland gaangen. No engem Studiegang an der Psychologie a Sozialwëssenschaften an Amerika huet d'Prinzessin hir Studien zu Paräis virugefouert. Do huet si eng Lizenz an der Philosophie mat Schwéierpunkt Eethik an Anthropologie gemaach. Ofgeschloss huet d'Prinzessin Alexandra hir Studien am Trinity College zu Dublin. Zanter 2017 huet si e Master an den interreliéise Studie vun der Irish School of Ecumenics mat enger Spezialisatioun an der Konfliktléisung.

Inauguration école préscolaire — © Cour grand-ducale / Carlo Hommel

2006: Aweiung vun enger Spillschoul zu Waasserbëlleg

D'Prinzessin huet Erfarung am journalistesche Beräich am Noen Oste gesammelt gradewéi an internationale Relatiounen duerch e Stage am Sécherheetsrot vun de Vereenten Natiounen zu New York zu där Zäit, wou Lëtzebuerg net-permanente Member war.

D'Prinzessin schwätzt fléissend Lëtzebuergesch, Franséisch, Englesch a Spuenesch. Dobäi komme gutt Kenntnisser an der däitscher an italieenescher Sprooch.

Portrait vun der Prinzessin Alexandra

Offiziell Aktivitéiten a Verflichtungen

Wann hire Kalenner et erlaabt, hëlt d'Prinzessin un den Aktivitéite vun der groussherzoglecher Famill deel an ass bei verschiddenen Zeremonien oder offiziellen Aktivitéiten dobäi, wéi dem Nationalfeierdag oder der Staatsvisitt a Japan am November 2017.

Um soziale Plang engagéiert d'Prinzessin sech als Benevole an der Flüchtlingshëllef. Bei der Lëtzebuerger Déiereschutzliga an der Fondatioun Lëtzebuerger Blannevereenegung huet si den Haut-Patronage iwwerholl.

Visite d'Etat au Japon - Le Grand-Duc et la Princesse Alexandra — © SIP / Jean-Christophe Verhaegen

Staatsvisitt 2017: Am Gaart vum Palais vun Akasaka- d'Prinzessin Alexandra huet hire Papp, de Grand-Duc, a Japan begleet.

Hobbiën an Intressen

D'Prinzessin ass un der Literatur intresséiert a reest gären, fir esou nei Kulturen a Sprooche kennen ze léieren. Si ass ganz sportlech a spillt ënner anerem Tennis, fiert alpine Schi a Waasserschi. Laang Zäit huet si och gedanzt a war am Turnen aktiv.